Marahil
ay alam ninyo na may insekto na tinatawag na Water Strider o Gerridae at dahil
sa kakayanan nitong lumakad sa ibabaw ng tubig ay tinatawag din itong Jesus Bug.
Pero
bago yan, kung ako lang ay makagagawa ng isang Pinoy musical film kagaya nang Jesus
Christ Superstar ng tukayo kong si Norman Jewison, ang awiting “Iisang Bangka Tayo” ng The Dawn palagay ko ang angkop na
kanta na kakantahin ng gaganap na Hesus sa tagpo sa ating ebanghelyo ngayon
(Mateo 14:22-33) na naka-tuon sa
dalawang pangyayari: tungkol sa paglalakad ni Hesus sa ibabaw ng tubig at ang apirmasyon
ng mga alagad na siya nga ay Diyos.
Ang
mga pari at mananampalataya ba sa ating Simbahang lokal sa layunin at diwa ay
nasa iisang bangka pa rin at hindi watak-watak sa pag-timon at pag-sagwan? O
baka naman nasa gitna pa rin ng unos ang sitwasyon ng pagpapalaganap ng
bokasyon ng pagpapari sa ating mga kabataang taal na taga-Kanlurang Mindoro.
Huwag sana, pero baka naman kagaya ng naranasan ng mga alagad ay nabubuhay pa
rin tayo sa kawalang-tiwala sa ating kakayahan. Baka naman nasa gitna pa rin ng
unos ang ating bangka sa konteksto ng sitwasyon na aking kababanggit lang.
Simula
noong unang panahon ng Kristiyanismo, ang bangka ay isa ng signipikanteng
simbolo ng Simbahan. Katunayan, ang mga sinaunang pook-sambahan ay naka-disenyo
na mistulang bangka at si Kristo ang ipinapakitang kapitan at timonero. Noong
taong 2012-2013 ang logo ng Taon ng Pananampalatay o Year of Faith ay kakikitaan din, bukod sa krus, ng karikaturang hugis bangka.
Sa
aking pagninilay bilang binyagan ay may paralelismo ang ating karanasan bilang
Simbahang Naglalakbay sa eksena sa ating ebanghelyo ngayong Linggo : Umaasa
tayo na huhupa ng tuluyan ang bagyong ito. Sapagkat habang walang
inisyatiba ang mga namumuno sa atin na muling mamamalakaya ng mga
kabataang upang maging paring diyosesano o buhayin muli ang ating seminaryo,
patagal nang patagal ang panahong hihintayin natin para sa kaganapan nito.
Kapag nagpatali tayo sa unos ay hinding-hindi susulong ang ministeryo ng
bokasyon dito sa atin. Alam ito ng bawat matinong timonero at peskador kahit siya ay hindi gaanong matalino. Natatakot
ba tayo gayong ang ating Banal na Timonero at Peskador ay paulit-ulit tayong
binibilinan na, “Huwag kayong matakot!”?
Kung
tayo ay nasa bangka pa ng takot at pagdududa, umahon na lang kaya tayo at lumakad sa ibabaw ng tubig, ituwid ang mga kahinaan na may pagtitiwala’t pananalig, kagaya
ng paanyaya ni Hesus kay Pedro at sa paglaon ay i-affirm ang ating paniniwala na si Hesus nga ay Diyos? Kaya,
halinang lumakad sa ibabaw ng tubig na naka-pokus sa layunin o kinabukasan at hindi sa
kasalukuyang masaklap na kaganapan. O itungo ang ulo sa nagngangalit na alon sa ating paanan.
Sa
pag-post ko nito, kagaya ng klasikong
pelikula ni Norman Jewison, tiyak na aani rin ito ng kritisismo mula sa malawak
na kawan ng elitistang Katoliko dito sa atin. At muli ay may mga mangungutya na
hindi naman pari o teologo at ni hindi
nga alumnus ng Catholic
school ang Norman Novio na iyan para maging credible sa ganyang mga biblikal na
pagninilay kaya hayun, dedma lang sila. Isa lang ang sa akin; Halos 20 taon din
akong gumaod sa iisang bangka kalakbay ang mga Pamayanang Kristiyano at natuto sa kanila hanggang
sa ako’y mapilitang lumabas at bagama’t noong una ay lubog ang moral, patuloy pa rin akong umaasa na ako'y unti-unting makalulutang o kaya ay makalalangoy kundi man matapang na makalalakad
sa ibabaw ng tubig katulad ng Jesus Bug !
O kaya'y patunayan sa aking bawat “homilog” (Homily-like blog) ang tinuran ni tukayong Norman Jewison na, “I think you get better as you get older.”…
-----------
(Photo : mylifeguardwalksonwater.wordpress.com)
No comments:
Post a Comment