Si Vic Vargas at Iba Pang Kuwento

Bihira na tiyak sa mga Generation Xers ang nakakikilala sa sikat na aktor noon na si Vic Vargas.

Bago iyan, isa sa mga paborito ko noon sa serialized comics sa Liwayway ay ang nobela ni Francisco V. Coching at sa dibuho ni Federico C. Javinal na isinapelikula  noong 1972 kung kailan ay Grade III pa lang yata ako. Ito ay ang pelikulang “El Vibora”. Ngayong uso na ang internet, at bilang isa ang pelikulang ito sa bahagi ng aking kamusmusan, diniskubre at inunawa sa pamamagitan ng makabagong lente ng teknolohiya at lulan ng duyan ang pagbabalik-tanaw sa mga bagay na kaugnay ng aking happy childhood.

Ang kuwento ng “El Vibora”, sa Liwayway man o sa telon ng El Mundo Theater ay pwede umanong ituring na halaw sa kuwento ng bayaning si Heneral Artemio Ricarte. Isang kilalang manunulat sa katauhan ni F. Sionil Jose sa aking pagkakatanda ay sumulat rin ang aklat na may pamagat na “Vibora!” noong 2007. Ang nobela ay naglalahad ng buhay ng isang Benjamin Singkol na nag-kuwento ng nalalaman niya sa buhay ni Ricarte. Si Ricarte nga pala, ang tunay na buhay na Vibora, ay marubdob na kontra Amerikano. Nakita niya kung papaano minasaker ng mga Kano ag mga Pilipino habang ang mga elitista niyang kababayan ay dinidiyos ang mga ito noon. Hindi niya masikmura ang pagbubulag-bulagan ng kanyang mga kalahi noon sa panunupil ng mga Kano. Naniniwala ang Vibora sa tunay na buhay na ang mga Kano ay ang siyang tunay na kaaway ng mga Pilipino kaya siya ay itunuring na taksil ng mga kapwa niya lider rebolusyunaryo noon.

Ang bida sa pelikulang aksyon na “El Vibora” ni Ishmael Bernal ay isinilang dito sa Kanlurang Mindoro kung hindi ninyo alam. Siya ang isa sa iilang versatile actors ng bansa at halos lahat na yata ng genre sa pelikula ay nagampanan na niya. Pero bago pa man ang “El Vibora” nauna siyang nadiskubre ni Doc Jose Perez na siyang may-ari ng Sampaguita Pictures habang nagtuturo ng Judo at Karate sa isang program sa TV. Una siyang nakilala nang magbida sa pelikulang “Diegong Tabak” noong 1963 hanggang sa mapansin siya sa mga pelikulang aksyon at drama at itinuring na macho man  noon ng puting tabing. Sa kabila nito, mahusay niyang nagampanan, sa isang pelikulang katatawanan, ang papel ni “Andres de Saya” na isa ring karakter sa komiks na likha ni Carlo J. Caparas. 

Kahit siya ay sikat na, may pagkakataong dumadalaw ito sa kanyang bayang sinilangan, nakikipag-laro ng basketbol sa kanyang mga pinsan ay kabarkada at namamasyal sakay ng kanyang scooter lalo na kapag piyesta sa kanilang lugar. Higit sa 60 pelikula ang nagawa niya simula 1950s hanggang 2002. Sa pelikulang “El Vibora” nga pala ay natamo niya ang “Best Actor Award” sa 7^th Manila Film Festival noon ngang 1972. Bago ito, gumanap din siya sa mga tinatawag na Bomba (or soft core sex) Films sa mga pelikulang pinagtambalan nila ni Rosanna Ortiz sa “Saging ni Pacing” ni Luis San Juan at “Bukid ay Basa” ni Ading Fernando at iba pa.

Ngunit nang tumamlay na ang kanyang karera, nasangkot din siya sa iba’t-ibang kaso na may kinalaman sa droga. Noong Disyembre 7, 1993, naaresto siya ng Malabon anti-narcotics unit dahil umano sa pagtutulak ng shabu sabi sa balitang ITO. Simula noong 1995 hanggang 2000 siya ay nanirahan na sa Taytay, Palawan. Sumapi siya sa Bantay Dagat sa layuning ingatan ang kalikasan doon at napabilang sa Charismatic Movement. Pero siya ay nakulong sa kasong estafa sa Pampanga noong Enero 2003 ayon sa ulat na mababasa DITO. Siya ay agad namang nakalaya hanggang sa ma-stroke at bawian ng buhay noong Hulyo 19, 2003 sa Pasay.

Si Vic Vargas ay si Jose Maria Marfori Asuncion sa totoong buhay na pamangkin ni Maximino Papa na naging alkalde ng Sablayan simula noong 1925 hanggang 1927. Noong 1929 siya ay naging alkalde rin ng San Jose at bumalik ng Sablayan at muling nahalal noong1938 hanggang 1940. Si Papa, na kilala sa taguring Minoy kasama ang ama ng artistang aking ibinibida sa inyo ngayon ay pinatay ng mga gerilya dahil lamang sa bintang na sila ay maka-Hapon.

Si Vic Vargas ay ipinanganak dito sa Sitio Busaran, Brgy. Poblacion, Sablayan noong ika-28 ng Marso 1939, eksaktong 74 na taon na bukas….

-------

(Photo: Philstar.com. Vic Vargas with Maggie dela Riva in the stills of "Ang Langit ay Para sa Lahat")